浮花
浮花是我近期看過最好的電影, 很艾慕杜華, 也不太艾慕杜華.說很艾慕杜華, 是因為浮花很女人. 不只全片以女性為主軸, 從女性的角度看事物, 最重要是那些細節的描寫, 例如: 阿女愛煲電話, 眾女愛吃零食, 阿媽問Penelope Cruz個胸點解咁大, 女人不明為何男人要睇波而花錢裝收費電視...全片的女人味就是這樣滲出來.
說不太艾慕杜華, 是因為浮花不怪雞. 沒有KIKA的蕩女, 沒有論盡我阿媽的人妖, 也沒有talk to her的強姦植物人的看護, 更沒有聖教慾的神父孌童辟, 卻只是淡淡訴說三代女子的親情. 笑中有淚, 感人.
Penelope Cruz的演技冇得彈, 一改我從前對她僅屬花瓶的印象. 不過, 其實她姊姊Sole的角色更難演, 很平凡的失婚婦人, 但她演得恰如其份(卻又有很多笑位). 話又說回來, 好像沒有哪個角色演得不好.浮花的譯名也屬神來之筆, 雖然不少人批評沒有原文Volver回歸之意, 也好像跟電影沒有關係, 但我卻覺得很有詩意, 也很貼題: 女人如花, 卻因為沒有男人, 沒有倚靠, 所以像浮萍. 當然若你以香港人最愛用的以英語直譯, 也通(不過以西班牙語來讀, V恐怕是B音).
浮花雖好, 但我還是覺得Talk to her好一點. Talk to her那份淡淡的哀愁, 令人難以忘懷. 戲裏那首鴿子, 也曾令我像男主角一樣, 聽着聽着, 感動得有點想哭.
posted by 鬼茂 @ 1:08 AM
12 comments
12 Comments:
有笑位,令我哈哈大笑.有感動位,令我淚如流水.近期難得的超級佳片,值得推介.
艾慕杜華,正.
(如今只得ifc和百老匯電影中心有得睇,要快啦!)
This comment has been removed by a blog administrator.
的而且確，今屆康城六女齊齊奪得最佳女角，壯觀。
戲名，會不會就是取材自張愛玲的散文短篇〈浮花浪蕊〉呢？我是張迷，一聽已心動，不問來由。
戲名其實在歌詞裡也出現過，「浮花，歸來額角添霜，歲月如雪，染白娥眉一雙……」我是邁克迷，一看著迷，音在前而義在後，過癮。
好激氣，去APM以為果度都有得做，點知原來只有ifc及bc有，好激氣啊！佢地唔係同系戲院咩？想偷懶唔上網check就領野，又睇唔到添。要等下個禮拜睇，希望無咁快落啦！
早排聽電台的影評節目，都讚過彭妮露古絲（差的打錯古妮高娃），話佢先係女主角，在康城應獨得女主角獎，要同人分有的唔抵，不過又讚過其他的女演員都好搶。
雖然今次無人妖、無同志、無變態護士，但好以話有鬼喎！咁今次有無正歌，好似Talk to her果首Cucurrucucz Paloma及Bad Education果首Moon River咁正先？其他等我睇完再同你講。
另，去到apm無得睇，不過都企左係度睇一陣trailer，是蘇菲婭哥普拉拍果套新片Marie Antoinette，由Kristen Dunst演瑪麗王后（陪路易十六上斷頭台果個），全片在凡爾賽宮及巴黎郊外實地拍攝，佈景化裝都超正，上果時都會去睇下。
Paloma真是很正,小弟不時拿出來重溫...
明天就要去看了
To Anonymous: 原來浮花咁多典故, 我不是張迷與邁迷, 真的不知道呢. 還有不知道的, 是你是誰呢? 也沒相干, 謝謝留言.
to gael: 邊有人去睇戲唔理邊間做架!傻架你! 至於戲, 還是等你看完後才說啦. 不過可以吊吓你癮:Penelope Cruz有段solo, 好正.
to 茂斯:我那時很迷Cucurrucucú Paloma這首歌, 不單在msn改名做paloma, 還買了Caetano Veloso兩隻CD, 不過他其他的歌不算很好聽, 或者說唔啱我啦.
今日終於睇啦！都不枉我咁迷老艾，無令我失望地離場（雖然上次睇聖教慾有少少，但我都畀佢75分，與我最喜歡的論盡我阿媽的97分有一點點距離）。
每次都很期待去睇老艾的戲，總會有些驚喜，不論是大驚喜或是小驚喜，說是當然不只是那些人妖啊、男護士啊、孌童神父啊，還有馬面家姐啊之類的（當然這些都好嚇得人，同埋一定成為談論熱點），而是他那細緻得驚人的人情描寫。
暫時在我的心目中，只有另一「至愛」奇斯洛夫斯基及得上，兩位大師寫人鄰關係之境界，我只能說兩個字﹕「絕世！」
慶幸艾慕度華仲在世，不斷再有新片，老奇就要不斷重看紅白藍、十誡等，不過真係百看不厭架我覺得。
講返套戲，真係咁橋，Venus個blog都係講浮花，我在她那裏講的感受，此處不重複，以免一稿兩投咁老土，講的都是不同的東西（套戲有太多東西藉得講啦）。
不過你提到Penelope Cruz被阿媽窒個胸大，係咪隆過黎，Venus都有提及，真係好鬼橋喎。咁Penelope Cruz今次「回歸」西班牙再拍艾慕度華又真係幾博，全場deep V衫，矢志要威返次畀荷李活那些人睇（確實佢又真係做得到，榮膺影后），連老艾都要幽佢一默添。
老艾的片每次「唱歌位」都是精點所在，今次都不例外，彭妮露古絲唱西班牙老歌volver，係阿媽Carmen Maura細個時教佢唱的，一面影「回魂」阿媽帶住唔敢（或者係自覺無面）見返阿女的心情，在車中飲泣的情景，我相信睇過的人都無邊個話會唔感動掛。
仲想講下幾個女角﹕
1。阿彭好戲，除唱歌果幕，仲有保護個女，同佢頂罪收屍啦；同阿媽在長椅傾訴，兩人結開多年的鬱結啦；不能不提的還有將老公葬在同佢生前一齊拍拖的河邊啦；成面血咁去應門，說謊話自己姨媽到啦……演得都好掂（唔單只係忽然大了的身材架！）
2。阿媽真係好搶戲，由當初扮到鬼一樣在車尾箱爬出來（唔知點解我想起了貞子）；到在車上聽到阿女唱歌而悲從中來飲泣；到扮俄國婆幫大女兒手洗頭；以及到同孫女在床上傾偈等等，都是全片的靈魂。
3。家姐素麗Lola Duenas，某程度仲掂過阿彭，佢見到回魂媽嚇到通屋走；出主意叫阿媽扮唔識西班牙話的俄國婆；拿住個篋走來走去來來回回要同阿妹解釋自己唔係貪心等。
4。不能不提故鄉鄰居俄古絲汀娜Blanca Portillo，又是片中另一奇葩，好鬼型，遠睇成日以為佢係男人，正好作為平衡，成為片中的「男主角」。但這只是她的外形而言，實際佢又是一個千里尋母（去到馬德里）的女兒。
5。連戲份甚少的肥妓女鄰居（都唔知有無出場十分鐘？），但都出奇地搶，佢要阿彭講老實話，又自覺還是不聽不知不了解的好……
6。阿女Yohana Cobo殺了老竇（當時唔知唔係親父）唔知點算在街淋雨等阿娜放工返黎，都演得不錯。
總結，老艾拍女人戲始終有一手，那些賣菜啊、周街都遇上鄰居會搭訕話家常啊、睇電視啊、煲電話粥啊……全部都好自然，娓娓道來，就如世界性的女人語言，隨時有個在你身邊一樣。
仲有實在太多野想講，例如拍得好鬼靚的老艾家鄉回轉風車；今次沒有隨風飄的膠袋、報紙，但有吸血廚房花紋紙巾和地拖；以往精妙的戲上戲，今次勉強都有，是「型仔」俄古絲汀娜上電視爆料又突然改變主意拂抽離去的一幕，都好重要……等等。不過講太多驚你悶，或佔你太多空位，還是等你開「浮花之二」的題目，再作回應吧！
但不說不可的是，你記得阿失業老公在家睇邊隊對邊隊的球賽嗎？提示﹕當然是西甲，要考考你記性！
仲有，睇完後好想去多一次西班牙，老艾將西班牙人見面的錫面聲音，以及送殯女人鄉里一身黑色呢士衣裙及不斷扇黑色繡花扇子等等，都非常西班牙，當然還有那些flamango和tango配樂啦！他鏡頭下的一條河、一群風車、一個村落都好靚呢！
PS﹕同日仲睇優先場、泰國片《攣鳳和鳴》，一日連睇兩套女人群戲都幾係野，不過出乎意料，套戲都幾得，個結局不落俗套，同樣的片，荷李活或香港導演可能又來一個大團圓，觀乎Lake House就知。
再來PS﹕好似無為浮花評分，「回歸」起點，聖教慾同論盡我阿媽都有評分，新戲無理由不評一下吧！在我心目中值88分，幾好意頭！
最後PS:突然好想多謝你借套蕩女Kika我睇翻，其他早期老艾的片暫時只找到英文字幕版，一來怕辛苦，加上太貴，要六百幾蚊，遲些睇下有無得買返，你見到或你的friend見到請通知一下，謝！
仲有不能不說，你個friend阿匿名者提到，邁克的字幕翻譯簡直是典範，尤其是彭妮露古絲那首歌。要知道翻譯外文詩歌一直是大學功課中的頂級難度課題，因為要譯得「貼」又要保留意境，試看volver歌詞中譯版的經典之作﹕
「浮花，歸來額角添霜，歲月如雪，染白娥眉一雙。……感覺，生命轉眼即逝，二十年如煙似幻。微溫回望，徘徊在影子尋你喚你。渡日，心靈緊緊牽絆，清甜的記憶，我再次為它流淚。」（其實我已找到西班牙原文及英文譯本，但不在此張貼以免阻你地方！）
點解真係勁得咁緊要架，你話係咪！不覺自慚形穢，要拿出荒廢了十年的詩詞書出黎溫一溫。
唯一有點奇怪的是，點解阿媽要教小女孩阿彭唱這樣滄桑的歌，去參加小學生天才表演？
gael:
好可怕的回應, 好長呀!
不過你也不用怕阻我地方, 因為地方大把, 哈哈. 你也不妨將在別的地方寫浮花的感受, 轉貼過來, 我也想睇吓.
btw, 那場波, 是薩拉戈薩對貝迪斯嗎?
有冇咁低能呀!(口頭嬋,冇眨意)
人家電影中的電視裹那埸波,都知播邊場...你o地真係"專業",應該係"職業病"至真.
影藝十一月底收檔
Sorry，You are wrong！
那場波應該是拉科主場對桑坦德，下次交畀你做睇波Guide啲波衫，你一定認得啦！
Post a Comment
<< Home